COKODIDI

nyandak gampang katuk mo didik anak
apa lei rupa anak-anak skarang
adakalanya dorang so tau talebe-lebe:
lebe dulu, lebe banya, lebe soe,
lebe gila, lebe sadis
deripada dorang pe sebe deng ajus

kita nyandak mo ambe pusing
kalu apa yang dorang lebe tau
dong trima deri dorang pe guru
of deri buku-buku plajaran skolah!
mar yang jadi soal
dorang ja basingga di kios-kios
di kios-kios yang ja bajual rupa-rupa buku
kalu tu buku-buku tentang Sukarno
of soal kase bae orang seno
ato bagimana barmaing piano
bole jo no!

mar di situ ja bajual buku porno
abis baca ada yang rupa gai gatal
tu laeng rupa kanal sosoro gatal
tu parampuang pe mulu-mulu trus jadi gatal
kong tu batang-batang mulai batangang gatal
babadiang basewa felem sadis di tampa rental
kalu sampe dorang pe moral so fatal
sapa lei bole tidor tasono

Kota Air Tondano, Senin 23 Juli 2007
(untuk Hari Anak Indonesia 2007)

By : Fendy Parengkuan